Álbmotgirjeráju Rotunda-bláđis lea gieskat almmustuvvan artihkal Sámegielaid doarjja digitála bálvalusain -fidnu barggu ja ulbmiliid birra. Varas nummira temán lea ovttasbargu, mas muitaluvvo dárkileappot maiddái fidnu geahččanguovllus. Artihkal lea lohkanláhkái davvisámegillii ja suomagillii (suomeksi).

Mii háliidit cealkit dearvvuođaid Finto-bloggii ja muitalit, ahte mii ráhkkanit aiddo Finto.fi geavahanlavtta ja YSO davvisámegielat jorgalusa vuosttas veršuvnna almmustahttimii. Dát gokčá vehá vádjit beali YSO tearpmain, ja stuorámus oasi dábáleamos doahpagiin. Measta buot geavahanlavtta oasit doibmet dán maŋŋá davvisámegillii. Orru, ahte dán oktavuođas dahkkon iešguđetlágán ovddidanbarggut leat dolvon Finto.fi:a máŋggagielatvuođa ovddosguvlui viidáseappotge go dušše beare davvisámegielat jorgalusa oasil. Buot ii leat gárvvis, muhto mis lea vel áigi, dasgo fidnuge joatkašuvvá vel badjel jagi. Maiddái joatkka plánejuvvo obbaáigge áŋgirit.  

Ulbmilin lea vuosttas veršuvnna almmustahttima bokte čoaggit máhcahaga ja geavaheaddjivásáhusaid go fidnu bargu lea vel jođus. Davvisámegielat jorgalusat bohtet YSO lassin maiddái KOKOi, ja daid sáhttá álkit doalvut iešguđetlágán Finto ontologiijaid adni bálvalusaide. Mii ovddidit ovttasbarggu Álbmotgirjeráju bálvalusaid siste, muhto sávvat, ahte bargomet ovddida sámegielaid doarjaga maiddái eará sajiin, gos min bálvalusat leat geavahusas.  

Buresboahtin lohkat bláđis min barggu birra! Mii ávžžuhit maiddái smiehttat, gávnnatgo gánske iežat organisašuvnnas vejolašvuođaid atnit ávkin YSO davvisámegielat jorgalusa ođđa vugiiguin? Mii vuostáiváldit mielas máhcahaga ja ođđa jurdagiid!  

Olles bláđi beasat lohkat Doria-bálvalusas čujuhusas: https://urn.fi/URN:NBN:fi-fe2023042638944.